Македонскиот министер Ташковиќ во Канада

Министерот задолжен за привлекување странски инвестиции Глигор Ташковиќ кој од 29 мај престојува во Канада, во изминатите денови посети неколку компании од автомобилската, прехранбено - земјоделската и информатичко - технолошката индустрија.
Ташковиќ ги презентира можностите што ги нуди Македонија за странските инвеститори, посочувајќи ги како клучни намалувањето на даноците, воведувањето рамен данок, слободните економски зони и договорите за слободна трговија. Тој им порача на македонските иселеници во Канада дека сега е вистинското време да се вратат и да инвестират во својата држава.
Во Торонто министерот Ташковиќ се сретна со претставници на авиокомпанијата „Скајсервис Ерлајнс“. Договорено е од 2008 година да биде пуштена директна авиолинија Торонто - Охрид.
Ташковиќ деновиве во Монтреал треба да одржи состаноци со најуспешните компании од овој град, а задутре заминува за Отава каде се очекува да оствари средби со министри од канадската Влада. Тој е поканет да присуствува на бизнис-форумот што го организира Стопанската комора на Канада, а на кој ќе учествуваат највлијателните луѓе од бизнисот овде.